तमानखोला आधारभूत अस्पतालमा माइनर ओ.टी. सेवा सञ्चालन, गाउँपालिका अध्यक्षद्वारा सामाजिक सञ्जालमार्फत जानकारी
बागलुङ — तमानखोला गाउँपालिका स्थित तमानखोला आधारभूत अस्पतालमा माइनर अपरेशन थिएटर ओ.टी. सेटअप गरी सेवा औपचारिक रूपमा शुभारम्भ गरिएको छ।
गाउँपालिका अध्यक्षले आफ्नो सामाजिक सञ्जाल मार्फत भिडियो सार्वजनिक गर्दै अस्पतालमा माइनर ओ.टी. स्थापना गरी सेवा सञ्चालनमा ल्याइएको जानकारी दिनुभएको हो। उहाँले यस सेवाको सुरुवातसँगै अब सामान्य शल्यक्रियाका लागि स्थानीय नागरिकले टाढाका अस्पताल धाउनुपर्ने बाध्यता क्रमशः कम हुने विश्वास व्यक्त गर्नुभएको छ।
माइनर ओ.टी. सञ्चालनमा आएपछि सामान्य प्रकृतिका शल्यक्रिया, घाउको उपचार, टाँका लगाउने तथा अन्य आधारभूत शल्यक्रिया सम्बन्धी सेवाहरू स्थानीय स्तरमै उपलब्ध हुने अपेक्षा गरिएको छ। यसले समय, खर्च र बिरामीको दुःख कम गर्न महत्वपूर्ण भूमिका खेल्ने विश्वास गरिएको छ।
विशेषगरी दुर्गम क्षेत्रमा बसोबास गर्ने नागरिकका लागि यो सेवा ठूलो राहत हुने देखिएको छ। यसअघि सामान्य शल्यक्रियाका लागि समेत बिरामीहरूलाई जिल्ला सदरमुकाम वा अन्य ठूला अस्पतालसम्म पुग्नुपर्ने अवस्था थियो।
गाउँ पालिकाले स्थानीय स्वास्थ्य सेवाको गुणस्तर सुधार गर्दै नागरिकलाई सहज, सुलभ र प्रभावकारी स्वास्थ्य सेवा उपलब्ध गराउने उद्देश्यका साथ आवश्यक स्वास्थ्य पूर्वाधार तथा उपकरण व्यवस्थापनमा निरन्तर काम गरिरहेको जनाएको छ।
स्थानीयवासीले पनि अस्पतालमा माइनर ओ.टी. सेवा सञ्चालन हुनु गाउँ पालिकाको स्वास्थ्य क्षेत्रका लागि महत्वपूर्ण उपलब्धि भएको प्रतिक्रिया दिएका छन्। आगामी दिनमा आवश्यक जनशक्ति, उपकरण र विशेषज्ञ सेवाको थप विस्तार गरिँदै जाने अपेक्षा गरिएको छ।